Aoir a scríobh Kim McCone

Ní a fhios agam conas atá cúrsaí anois, ach ba bhinbeach saol acadúil na Sean-Ghaeilge tráth den saol. Seo aoir a chum Kim McCone ar chuid dá leathbhádóirí.

Recensio secunda fabulae in codice olim Burlingtonensi nunc autem
Valdronensi repertae

Incipit Togail Bruidne Da Máeldruad 7 Cath Maige Mell 7 Ríastrad Messe
Búachalla 7 Glenamon Dáeltengad i Tóin Murchada

Boí toísech écond úathmar for ardléigiund Érenn, Da Máeldruí a ainm. Boí
ollam drúth occo. No:anad in rígdrúth isin tig oc freiscsin cíangothae
in tain nad:mbed oc imthecht ó dáil co dáil for íarair chomrac. Fraince
ainm in drúith, mac-side do Chano, 7 ba lán Ériu di airdircus a chlesae.
Luid fecht n-and co cathraig inna Trindóite co:n-accae in fer ara
chiunn. "Indam:bia-sa úar choimcheilge lat?" ol in fer. "Is ed
do:roachtmar sund" ol Mac Cano. "Cía tussu 7 cid as áil duit?" "Murchad
atom:chomnaic-se" olse, "suí bélrai theipidi isin chathraig so.
Ro:memaid form i cosnam na hapthaine sund 7 is mebul lemm aní sin.
Ad:cobraim techt do ardléigiund indossa. Congnae frimm!"

"Do:bér comairli duit" ol Mac Cano. "Eirg do bruidin Da Máeldruad
innocht. A:tá tairbfeis and 7 is tú bas ardollam de. Caccfaid tarb 7
ísait triar, .i. Da Máeldruí, Bángabáltaid 7 atom:chomnaic fadéin, a
sáith din tarbchacc sin. Na:scefet íarum 7 intí íbas in tarbchacc
brúchtas úadaib, for:bia ardléigend n-Érenn co bráth acht nad:rogba for
forcetal ná for scríbend".

Do:gní Murchad samlaid co:ndéntar ardollam de. Níptar fáilti fris fisidi
7 forcitlidi Érenn. "Ní méte aní sin" ol Murchad, "acht ropa inmain la
Da Máeldruid 7 lasna mná óentamai do:n-inóliub immum. Im:cáemros-sa do
báethaib húare am báeth fadéin". Téit isin mbruidin la sodain conid
ardléigend co fresabru boíe isin tír ónd úair sin. Bátar trá
deoladchairi mára for ardléigiund Érenn i flaith Murchada 7 Maic Cano,
.i. cruinnigthi menci ó Samain co Samain cacha blíadnae, comrád cach
n-óenlaithe 7 choimchelg cach n-óenaidchi, imbed cíangothae 7 tarbchacc
co glúine.

Fo:dordsat íarum fisidi Érenn im gabáil a léigind díb 7 gabsait for
forcetal 7 for scríbend co:n-accaitis cía domaín do:n-áirced don diis a
léigend ina flaith. Ba sáeth la Da Máeldruid forbart ind léigind sin
co:n-epert fria muintir "Accaldam rechtaide friu!" "Do-s:ngén-sa" ol Mac
Cano, "re ciunn inna blíadnae" acht for:émid cid aní sin conid i tossuch
indala blíadnae ad:gládastar firu Érenn i Maig Mell. Ba olc la áes
léigind Érenn ind accaldam ro:cúalatar. A-t:raig Donnchad Dáeltengae,
senchaid Corcaige. Ba cosmail a bolg-side fri dabaig cormae 7 batar lir
saithe mbech ind braín neime no:siltis assa béul. Sillis cách fair
co:n-epert: "Quousque tandem abutere, Canellone, patientia nostra?" Is
and cachain in duine dáeltengthach in roscad so, ut stulti quidam
dicunt, vel rectius retoiric, ut alii peritiores putant: "Én a maic  már
in cacc  fo:cheird for ardléigind  enech innocht.  Nemthes ollaman
ní:áirilli cano".

Fergaigistir Mac ind Éoin, .i. bachlach báesach búiredach lassa:mboí
guth cosmail fri gairm cailig, fri Donnchad 7 a chairtea acht
cachain-side laíd neimnig n-aili frissin mbáesach: "Mac ind Éoin  áirmi
bríathra.  Brígach a guth  gand a intliucht.  Eirc ind lúath  for
longais co Gaillim". "Is ardu ro:mbúiriur oldáthe-si uili" ol Mac ind
Éoin. "Ra:fetammar ém!" olseat ot é oc gáirib. Teichid in báesach
dergainech la sodain 7 luid in slúag co tech midchúarta Maige Mell
co:tairsitis óol and.

Tinól Da Máeldruí áes n-ardléigind isind laithiu íarnabárach. "Do:gén-sa
acaldaim indossa" ol Murchad cíabo geis dó forcetal cid óenfecht.
Scríbais in n-accaldaim conda:arlégad. Coll ngesse aile dó aní sin. Luid
íarum co Mag Mell co:n-árladad firu Érenn a frithisi acht níbo maith ind
accaldam. Fo:ceird leth in tige i rucad in gúaccaldam fon aill la sodain
conid:ndlomsat muintir Maige Mell. Luid Mac Cano for teiched 7 for
forlúamain co:rránic Droichet Camm isin díthrub tar ler, conid Fraince
Bostún, .i. geilt, ro:boí fair ónd úair sin. Geis do lucht ardléigind
accaldam rechtaide do dénum íar suidiu condat echtrainn do-da:gniat
indossa.

Is and do:airchechain int ollam braigetórachtae Maige Mell no:mbáidfide
Murchad ina chacc cadesin i ndeiriud a flatho feib as:n-ib tarbchacc in
triir ina tossuch. Mess, .i. praisech la Saxanu, Búachalla a ainm ind
braigiri. Ba bés leis-som a léne 7 cid a chrius brágat do chur isa
n-étach mbecc fo:luiged a thóin in tan nad:mbed occa dán. No:bíth gillae
ina arrad ó matain co fescor cach laí. Tánaic for menmain Messe comarbae
Pátraic do dénum dia gillu i Maig Núadat acht ní:léiced isin senad 7 is
Rúaidri, prímecnae in tuaiscirt, do:goad and.

Ríastarthae im Mess mBúachalla i suidiu. Inda lat ba tindorcun as:n-ort
cach brécfiacail assa chiunn lasa núall do:rigni. Inda lat ba oíbell
tened boíe for cach óendéit. Íadais a inchinn connárbo letha in-daas cró
snáite. As:oilg a béolu comtar moir coire. Brúchtais a mbroimm ferge
assa thóin comtar buidithir sceith a muinter lassin ndrochbolad, conid
de ro:lil Búachalán Buide fair, .i. in lus as messam in Ére. Scríbais
litir do cach epscup in Érinn íarum. No-s:ngádatar 7 senchruimther
díblide boíe i COMAR leiss ara:ndéntais togu nue acht do:sluindset ind
epscuip doib a n-as:mbertatar:

Mebul a con:daigi, a Mes. Cid ara:ndéni drochcles? Léic úait úabar do
chridi Do-t:ralae for drochsligi.

Mad Donnchad immurgu, tréicis-som a léigend 7 a chairtea íar tain. Luid
do ardléigiund co:corastar a dáeltengaid i tóin Murchada. Ligthius ind
léir co:ngíuil a thengae indi. Nícon:comnaic a glúasacht eissi etir.
Secht mblíadnai do Murchad cen caccad amal sodain combo lán a inathar.
Ind ré chétnae do Donnchad cen dul Corcaige co:ndúnad in scol senchasa
ina écmais. Is imbed cacca brúchtas ó Murchad la deilm már issint
sechtmaid blíadnai. Líntae a tech i mboí co:mbáided and. Loiscthe a tech
fair íar suidiu. Fo:cress Donnchad issin n-aer lassin sruth cacca
co:tochar for talmain oc Áth inna nDam. Ba sáeth la Saxanu in duine
caccach trotach ina mesc acht ní:cumcaitis a sechmall.

Fecht n-and dia:mboí Donnchad ina suidiu ina chacc cadeisin gabsai ferg
már. Is and scríbais in n-aír "aithechollam ro boí for Laignib hi Maig
Nuadat .i. Cimbáeth Pitgnúisech" 7rl. For:congair fora bantimthirthid a
foít timchiull Érenn. Dos:n-adbaid Cimbáeth dia séitchi, .i. ind
bansenchaid. "Is áer cháinti fri filid!" olsi os sí oc gáirib. Co:cúalae
Donnchad aní sin. Tánaic foa menmain techt co hÉrinn la sodain
co:ndernad cammrunnu frissin n-ollamain i Maig Núadat ar ba sáeth leis a
ngrád boíe fair. Ba olc ind adaig la gaíth máir fo:fúasnad in foirrci
fond luing i mboí. Con:ráncatar 7 Cimbáeth didiu íarnabárach. "Lán cóic
libuir dit brécaib scélaigechtae," ol Dáeltengae. "A lán cóic lebor ém
dim scélaib fíraib," ol int ollam. Cachain Dáeltengae in rann so fris
íarum.

Is acher in dáel innocht, Fa:rúasan adaig gaíthe. Do:gní cloí fri
Cimbáeth mbocht Oc ingairiu bó n-Aífe.

"Ní maith in rann," ol Cimbáeth. "Am ferr mo filid indaí-siu, a ollam
cen ecnae", ol Dáeltengae. "A:taam uili cen Peritia ó chíanaib acht
do:bér óenrann duit," ol Cimbáeth.

A scél inna mbó ní baí, Is gó fo:cheird cacc fort chlú. Indossa cíaba
mart máel, In dáel ro-da:dart is tú.

"Is fír són," ol fir Érenn. Ata:rechtatar teoir ferba for dib ngrúaidib
nDáeltengad la sodain. "Is tú as aithech pitgnúisech in fecht so," ol
Cimbáeth. "Do:tét mess fo aimsera," ol Donnchad. Teichid co Mag Mell 7
gabais for foglaimm mbraigetórachtae and ar ba bés dó labrad tria thóin
riam.

Finit. Amen.