04 Meitheamh 2009

“Níl aon rud nua faoi luí na gréine.”



Briathra Chóheilit (1:9), agus é ag clamhsán faoi stíleanna gruaige.



stíleanna gruaige


Dúirt Cú Chonnacht sna nótaí tráchta inniu go “dtaispeánann pictiúr Derrick[e] ón aois chéanna go raibh gruaig fhada acu, gruaig shúgánach mar a déarfá.”  

Le go mbeidh muid uilig ar an leathanach céanna, seo agaibh dhá leathanach as an leabhar Téamaí Taighde Nua-Ghaeilge ar a bhfuil an pictiúr atá i gceist.  Clicáil ar an bpictiúr le híomhá níos mó a fheiceáil.


iomaíocht

Ar bhain sibh triail as an inneall cuardaigh nua Bing? Is féidir go bhfuil róbat a dhiongbháilte casta ar Ghoogle faoi dheireadh. Is maith liom é -
- agus níl baint dá laghad agam le Microsoft!

glib eile

Meas tú an bhfuil a fhios ag Kate Gosselin go bhfuil glib uirthi?

03 Meitheamh 2009

an ghlib

Ós ag caint ar ghruaig a bhíomar, seo cuid de liníocht le Albrecht Dürer, ón séú haois déag.  Tá an pictiúr iomlán le feiceáil anseo. Tá an stíl ghruaige seo cosúil le mullet aisiompaithe: an cúl gearr agus an gruaig fhada aníos ar chlár an éadain.  Dealraí0nn sé go raibh an stíl seo an-choitianta i measc na nGael ag an am sin agus gur chuir sí an-olc ar na Sasanaigh!  Féach an sliocht seo ó reacht a ritheadh i bParlaimint na hÉireann, faoi stiúir Anraoi VIII :

[N]o person ne persons, the King's subjects within this land being, or hereafter to be, from and after the first day of May, which shall be in the yeare of our Lord God a thousand five hundred thirtie nine, shall be shorn, or shaven above the eares, or use the wearing of haire upon their heads, like unto long lockes, called glibbes, or have or use any haire growing on their upper lippes, called or named a crommeal...

An rann eile


Seo é an dara rann a bhfuil baint aige leis an gcat geal a chuaigh i bhfiáin.  Níl mé céad faoin gcéad cinnte faoin eagarthóireacht ná faoin aistriúchán, ach rinne mé mo dhícheall:

Is amal sin drochduine
aile do rér a thoile;
ó dogní tú duine de
atá lái uait do drochduine.

Is amhlaidh sin, drochdhuine
eile a réir a thoile;
ó rinne tú duine de [.i. ó tháinig tú in inmhe?]
tá lé agat le drochdhuine.

Ó Cuindlis: an dá rann


Mar a dúirt mé inné, tá dhá rann sa nóta imill faoin gcat geal.  Seo é an chéad cheann:

Cuilén caitt
nod·n-aile hé comba haitt;
ó ro·gaib míadugud
téit úait fri fíadugud.

Coileán cait
a thógann tú le bheith ait [.i. taitneamhach];
ó fuair sé miadh [.i. onóir, nó aire & gean]
téann sé uait i bhfia [.i. i bhfiáin, nó ag fiach]